İNTELLEKTUAL İDARƏ OLUNAN BAKI NƏQLİYYATI

Əziz və dəyərli oxuyucular, nəqliyyat sektoru ilə bağlı son günlər qarşıma çıxan problemləri və onları necə dəf etmək barədə fikirlərimi paylaşıram...

Son illərdə Nəqliyyat Nazirliyinin İntellektual İdarəetmə Sistemi ilə tanış olduq. Bu addımı olduqca xoş qarşıladım və Azərbaycanın ən böyük şəhəri olan Bakının nəqliyyat sisteminin intellektual idarə olunması xəbəri ən çox məni sevindirdi. Bu sistem tətbiq olunandan bir müddət sonra sürücülər, sərnişinlər bundan narazılıq edirdi. Sözün düzü başa düşə bilmirdim bu narazı olan insanları ki, görəsən insanlar bu cür intelektual idarə olunan nəqliyyat sektorumuzu niyə bəyənmirlər?

Əslində isə “intellektual” idarəetmədə kifayət qədər çətinliklər var. Əvvəla, ictimai nəqliyyatda vahid ödəniş kart sisteminə 2012-ci ilin aprelində keçmək nəzərdə tutulmuşdu. Həmin tarixdən nə az, nə çox 3 ildən artıq zaman keçir, görəsən 3 ildə “intellektual” idarə olunan nəqliyyatımız bu sistemə niyə keçə bilmir?!

ARDINI OXU...

Bu yaxınlarda Azərbaycan mötəbər İlk Avropa oyunlarına ev sahibliyi etdi. Avropa oyunları zamanı şəhərdə hərəkətin sıxlıq müşahidə olunan yerlərində Dövlət Yol Polisi əməkdaşlarının köməyilə sıxlıq demək olar ki, yox idi. Xüsusilə 20 Yanvar metro stansiyası yaxınlığı və həmin dairədə olan taksi sürücülərinin və digər park yerlərinin oradan yığışdırılması kifayət qədər uğurlu addım idi. Lakin oyunlardan sonra vəziyyət yenə əvvəlkinə qayıdıb. Necə deyərlər, köhnə hamam, köhnə Bakı...

Avropa oyunlarının bitməsi fonunda 20 Yanvara, Milli Məclis, Şəhidlər Xiyabanı, Mərkəzi Klinik Xəstəxana, İçərişəhər metro stansiyası istiqamətinə buraxılan əvvəlki marşurtlar xəttdən çıxarıldı və ya bu ərazilərdən keçməmək tapşırıldı.

Xırdalandan 20 Yanvara getmək istəyən vətəndaş Şamaxinkada düşüb, 20 Yanvar istiqamətinə piyada getməli və ya Memar Əcəmi metro stansiyasına gedib ordan yenidən 20 Yanvara qayıtmalıdır. Həmçinin, Şəhidlər Xiyabanına şəhidlərimizi, Mərkəzi Klinik xəstəxanaya xəstəsini ziyarət etmək istəyənlər də piyada getməlidirlər, çünki bu istiqamətdə marşurtların hərəkəti məhdudlaşdırılıb. Yaxında isə metro yox, başqa ictimai nəqliyyat növü yox, insanların taksiyə verməyə pulu yox. Bu məntəqələrə çatmaq üçün əlavə zaman və pul xərcləmək nəyə lazım?!

"İntellektual” idarə olunan nəqliyyat sistemi bu illər ərzində göründüyü kimi heç də özünü doğrultmur.  

Nəqliyyat Nazirliyi ictimai nəqliyyatı intellektual idarəetmə sistemini daha da təkmilləşdirib və keyfiyyətli xidmət üçün aşağıdakı məsələləri diqqətində saxlamalıdır:

- İctimai nəqliyyatda vahid ödəniş kart sisteminə keçidin təmin olunması;

- Marşurt xəttlərinə ayrılan şirkətlərin ya mərkəzdən, ya da bələdiyyə, icra hakimiyyətləri tərəfindən nəzarətinin təmini (Türkiyə timsalında İstanbul Böyükşəhər Bələdiyyəsi nəqliyyatının idarə olunması təcrübəsini tətbiq etmək mümkündür);

- Sürücülərə, nəqliyyat şirkət rəhbərlərinə mütəmadi olaraq təlimlərin keçirilməsi (İnsanlarla münasibət, özünü aparmaq, yol hərəkəti qaydaları ilə bağlı və s.);

- Marşurtlarda mütəmadi olaraq reydlər aparmaq;

- İntellektual idareəetmə sistemində dünya təcrübəsinin xüsusilə,  İsveç (həm internetlə, həm birbaşa dayanacaqda dayanıb lazımi avtobusun nə vaxt gələcəyini dəqiq bilmək olar), Niderland, Fransa, Almaniya, Türkiyə və s. kimi ölkələrin təcrübəsindən yararlanmaq olar;

-Biletlərin alınması prosesinin internet üzərindən mümkünlüyünün təmin edilməsi.

Ümid edirəm ki, vətəndaş olaraq biz də tezliklə, sözün əsl mənasında intellektual idarə olunan nəqliyyat sisteminin faydalarından istifadə edə bilib, zamanımıza və əsəblərimizə qənaət edəcəyik.

Növbəti yazılarda oxunmaq ümidilə...

Vahid Məsimov