KƏND MƏKTƏBİNDƏN XARİCDƏ TƏHSİLƏ- EMİL GÖYÜŞZADƏ İLƏ MÜSAHİBƏ

Salam, dəyərli oxuyucular! Bu dəfəki mövzu xaricdə təhsillə bağlıdır. Müsahibim isə Emil Göyüşzadədir.

-Salam, xoş gördük. İlk əvvəl zəhmət olmasa özünüz haqqında  məlumat verin.

Salam, Mən Göyüşzadə Emil Göyüş oğlu, 1991-ci il aprel ayının 11-i Salyan şəhərində anadan olmuşam. Orta təhsilimə 1997-ci ildə Salyan rayonu Z.Həmidov adına Çuxanli kənd orta məktəbində başlamışam və 2008-ci ildə həmin məktəbi uğurla bitirmişəm. Həmin ili Azərbaycan Dövlət Neft Akademiyasının (indiki ADNSU) Energetika fakultəsinə qəbul olmuşam. 2012-ci ildə bakalavr dərəcəsini fərqlənmə diplomu ilə bitirmişəm və həmin ili ADNSU-nun Energetika fakültəsinin magistr dərəcəsinə qəbul olmuşam. Bir il hərbi xidmət keçdikdən sonra magistr təhsilimi davam etdirmişəm və 2015-ci ildə müvəffəqiyyətlə bitirmişəm.

Ardını oxumağı unutmayın ...

-Təhsilinizi hansı ölkədə davam etdirirsiniz?

2015-ci il Erasmus Mundus EMINENCE programı vasitəsilə Portugaliya Respublikasının Porto Universitetinin Mühəndislik Fakültəsinin “Service Engineering and Management” ixtisası üzrə magistr dərəcəsinə qəbul olmuşam.

-İndi isə Erasmus-un nə olduğunu, bu haqda necə öyrəndiyinizi, hansı tələblərə uyğun olmaq lazımdır, bu haqda təcrübənizlə paylaşın.

Erasmus layihəsi Avropa ölkələri və eləcə də digər ölkələrində təhsilin keyfiyyətini yüksəltmək, həmin ölkələr arasında akademik əməkdaşlığı möhkəmləndirmək məqsədi ilə Avropa Birliyi tərəfindən təşkil olunmuşdur. Aydın məsələdir ki, söhbət xaricdə təhsildən gedirsə, xarici dil bilikləri labüddür. Bundan əlavə, iş təcrübəsi və yüksək insani keyfiyyətlərə malik olmaq da üstünlüklərdən biridir. Tədris illəri müddətində xaricdə təhsil proqramları ilə mütəmadi maraqlanırdım bunlar arasındakı Erasmus proqramının şərtləri məni qane etdi və müraciət etdim.

-Niyə məhz Avropa? İxtisasınız nədir və nə üçün bu ixtisası seçdiniz?

Bakalavrda təhsil aldığım müddətdə xaricdə təhsil almağı qarşıma məqsəd qoymuşdum.

Avropanı seçməyimə səbəb burdakı yüksək keyfiyyətli, müasir və fərqli təhsil sistemidir. Bakalavr ixtisasım Elektrik mühəndisliyidir. Burada təhsil aldığım “Service Engineering and Management” ixtisasi ümumi mühəndislik və idarəetmə ilə bağlıdır k,i bu da mənim gələcək kariyeramda rəhbər vəzifələrdə işləməyimə yardımçı olmaqla bakalavr təhsilimi tamamlayır.

-Erasmus-un üstünlükləri nələrdir?

Erasmus Lahiyəsi çərçivəsində təhsil almağın bir sıra üstünlükləri var. Ən önəmlisi bütün yaşayış xərcləri və təhsil haqqı proqram tərəfindən ödənilir və bunun üçün heç bir öhdəliyin olmur yəni müqavilə bağlanmır və səndən tələb olunan yalnız dərslərini qaydasında oxumandır . Bundan əlavə  yeni dostlar qazanırsan və mədəniyyətlərlə tanış olursan. Üstəlik öz ölkəni xaricdə təmsil etməyə kifayət qədər imkanın olur.

-Azərbaycanı orada tanıyırlarmı? Azərbaycanı tanıtmaq üçün nələr etmisiniz?

Təhsil aldığım yerdə Azərbaycanı daha çox “Baku 2015 İlk Avropa Oyunları” və “Avroviziya" mahnı müsabiqəsinə görə tanıyırlar. Bacardığım qədər ölkəmizi layiqincə təmsil etməyə çalışıram. Bir dəfə universitetimiz tərəfindən təşkil olunmuş tədbirdə iştirak edib milli mətbəximizi təmsil edirdim. Milli mətbəximizin məşhur yeməklərindən olan “Üç bacı” dolması hər kəsin xoşuna gəldi. Bundan əlavə Portonun “Garcia de Orta” orta məktəbində 9-cu sinif şagirdlərinə 50 dəqiqəlik Azərbaycan haqqında təqdimat keçirmişəm. Şagirdlər ölkəmizi böyük maraqla qarşıladılar. Milli qəhrəmanımız Mübariz İbrahimov haqqında eşidəndə çox təəccübləndilər. Tək bir adamın bu qədər qəhrəmancasına döyüşməsi onları təəccübləndirmişdi.

-Xaricdə təhsil almaq nə üçün bizə lazımdır?

Xaricdə təhsilin bir sıra üstünlükləri var. Bizim təhsil sistemi ilə müqayisə etdikdə bu üstünlükləri daha qabarıq şəkildə görmək olar. Xaricdə təhsil aldıqda daha müasir daha səmərəli biliklər əldə edirsən. Bundan əlavə gələcək iş həyatımızda sürətli inkişafımıza zəmin yaradır. Xaricdə təhsil bizim dil bacarıqlarımızı inkişaf etdirir və ən əsası dünya görünüşümüzü və düşüncəmizi daha da dərinləşdirir.

-Portuqaliyada olduğunuz müddətdə başınıza gələn çətinliklər oldumu? Bildiyim qədərilə ölkəmizdə səfirliyin olmaması ən böyük çətinliklərdəndir. Xaricə təhsil üçün yollanmaq istəyənləri  gərək hərtərəfli məlumatlandıraq.

Əlbəttə, zəhmətsiz heçnə başa gəlmir, çətinlik həyatımızın bir hissəsidi. Haqlısınız, səfirliyin olmaması viza prosesində bəzi çətinliklər yaratdı, amma xaricdə təhsil almaq fürsəti bütün bu çətinliklərin öhdəsindən inamla gəlməyə kömək edir. İlk vaxtlarda yeni təhsil sisteminə uyğunlaşmaqda müəyyən çətinliklər oldu, amma vaxt keçdikcə daha sadə və kefiyyətli sistemin olduğunu görürsən. Bəzi yerlərdə dil problemi olur, amma xoşbəxtlikdən yerli insanların çoxu ingilis dilini bilir.

-Xaricdə təhsil almaq istəyən gənclərə məsləhətlərin?

Vaxtında qarşılarına məqsəd qoyub bunun üçün əllərindən gələni etsinlər. Gecikmədən dil biliklərini inkişaf etdirsinlər. Heç zaman uğursuzluqdan ümümdsüzlüyə qapılmasınlar, bu arada mən birinci müraciətimdə qəbul olmamışdım, ikinci müraciətimdə uğur qazandım. Unutmayın çəkdiyiniz zəhmət heç vaxt hədər getməz!

-Dolğun müsahibəyə görə təşəkkürlər! Təhsilinizdə  sizə uğurlar!

Mən də sizə təşəkkür edirəm. Bütün oxuculara işlərində müvəffəqiyyətlər  arzu edirəm.

Vahid Məsimov